ທົ່ວຂົງເຂດໄປສະນີ, ໂທລະຄົມມະນາຄົມ ແລະ ການສື່ສານ ແຂວງຈໍາປາສັກ ຮັບຟັງການເຜີຍແຜ່ການຈັດຕັ້ງປະຕິບັດວຽກງານສະກັດກັ້ນຕ້ານການສໍ້ລາດບັງຫຼວງ

ໃນຕອນເຊົ້າຂອງວັນທີ 11 ກໍລະກົດ 2019 ທີ່ພະແນກ ໄປສະນີ, ໂທລະຄົມມະາຄົມ ແລະ ການສື່ສານ ແຂວງຈໍາປາສັກ ໄດ້ຮັບຟັງການເຜີຍແຜ່ ການຈັດຕັ້ງປະຕິບັດວຽກງານສະກັດກັ້ນຕ້ານການສໍ້ລາດບັງຫຼວງ ທົ່ວຂົງເຂດ ປທສ ຂຶ້ນ ໂດຍໃຫ້ກຽດເປັນຄະນະປະທານຂອງທ່ານ ກອງແກ້ວ ປັນຍາພອນ ເລຂາຄະນະພັກຮາກຖານ, ຫົວໜ້າພະແນກ ປທສ ແຂວງຈໍາປາສັກ ແລະ ທ່ານ ສີບຸນຍັງ ຊາທອງຍົດ ຫົວໜ້າຂະແໜງຕ້ານການສໍ້ລາດບັງຫຼວງ ແລະ ການສຶບສວນ-ສອບສວນ ພະແນກກວດກາລັດ ແຂວງຈໍາປາສັກ; ມີຄະນະພະແນກ ປທສ ແຂວງ; ຄະນະອໍານວຍການ; ຫົວໜ້າ; ຫົວໜ້າ, ຮອງຫົວໜ້າພາກສ່ວນ ຈາກບໍລິສັດໄປສະນີ, ໂທລະຄົມມະນາຄົມ ສາຂາແຂວງຈໍາປາສັກ; ມີຫົວໜ້າ, ຮອງຫົວໜ້າ ຂະແໜງ ພ້ອມດ້ວຍພະນັກງານວິຊາການພາຍໃນພະແນກ ປທສ ແຂວງ ເຂົ້າຮ່ວມທັງໝົດ 57 ທ່ານ, ຍິງ 12 ທ່ານ.

ໃນກອງປະຊຸມ ທ່ານ ສີບຸນຍັງ ຊາທອງຍົດ ຫົວໜ້າຂະແໜງຕ້ານການສໍ້ລາດບັງຫຼວງ ແລະ ການສຶບສວນ-ສອບສວນ ພະແນກກວດກາລັດ ແຂວງຈໍາປາສັກ ໃຫ້ກຽດເຜີຍແຜ່, ເຊື່ອມຊຶມ, ນະໂຍບາຍ, ມະຕິ, ລະບຽບ, ກົດໝາຍ ແລະ ນິຕິກໍາຂອງວຽກງານສະກັດກັ້ນຕ້ານການສໍ້ລາດບັງຫຼວງ ໃນນັ້ນທ່ານໄດ້ຍົກໃຫ້ເຫັນ ຄວາມຮູ້ພື້ນຖານກ່ຽວກັບການສະກັດກັ້ນ ແລະ ຕ້ານການສໍ້ລາດບັງຫຼວງ. ເຊິ່ງແມ່ນ ພຶດຕິກໍາຂອງພະນັກງານນໍາພາ, ພະນັກງານຄຸ້ມຄອງ, ພະນັກງານວິຊາການ, ພະນັກງານວິສາຫະກິດລັດຖະກອນ, ທະຫານຕຳຫຼວດລວມທັງນາຍບ້ານ ແລະ ຜູ້ໄດ້ຮັບມອບສິດ, ໜ້າທີ່ໃດໜຶ່ງຈາກທາງການ ແລະ ພະນັກງານຕ່າງປະເທດ, ພະນັກງານອົງການຈັດຕັ້ງສາກົນ;

ພ້ອມທັງເຜີຍແຜ່ກົດໝາຍວ່າດ້ວຍ ການຕ້ານການສໍ້ລາດບັງຫຼວງ ແລະ ໄດ້ເນັ້ນນໜັກໃນບາງມາດຕາ ໂດຍສະເພາະມາດຕາ 4 ການສະກັດກັ້ນ ແລະ ຕ້ານການສໍ້ລາດບັງຫຼວງ, ມາດຕາ 11 ພຶດຕິກຳທີ່ເປັນການສໍ້ລາດບັງຫຼວງ, ມາດຕາ 24 ຄວາມເປັນແບບຢ່າງຂອງພະນັກງານ, ມາດຕາ 25 ຄວາມຮັບຜິດຊອບຂອງລັດ, ມາດຕາ 27 ຂໍ້ຫ້າມສໍາລັບພະນັກງານ, ມາດຕາ 28 ການແຈ້ງຊັບສິນ, ມາດຕາ 56 ມາດຕະການສຶກສາອົບຮົມ, ມາດຕາ 57 ມາດຕະການທາງວິໄນ, ມາດຕາ 58 ມາດຕະການທາງອາຍາ, ມາດຕາ 62 ມາດຕະການທາງແພ່ງ.

ກອງປະຊຸມໄດ້ປະກອບຄໍາເຫັນຢ່າງກົງໄປກົງມາ ບົນພື້ນຖານຄວາມເຫັນດີເປັນເອກະພາບ ແລະ ພ້ອມກັນເປັນເຈົ້າການໃນການຜັນຂະຫຍາຍວຽກງານ ດັ່ງກ່າວເຂົ້າໃນການຈັດຕັ້ງປະຕິບັດໜ້າທີ່ວຽກງານທົ່ວຂົງເຂດ ປທສ ໃຫ້ໄດ້ຮັບປະສິດທິຜົນສູງ.

ຄວາມຄິດເຫັນ

ຄວາມຄິດເຫັນ

LEAVE A REPLY

Please enter your comment!
Please enter your name here