ທ່ານ ບຸນສະເຫຼີມໄຊ ເຄນນາວົງ ຕ້ອນຮັບຄະນະຜູ້ແທນສະພາທຸລະກິດລະດັບພາກພື້ນ ອາຊຽນ-ອາເມລິກາ ເຂົ້າຢ້ຽມຄໍານັບ

0
44

ເມື່ອບໍ່ດົນມານີ້ ທ່ານ ບຸນສະເຫຼີມໄຊ ເຄນນາວົງ ຮອງລັດຖະມົນຕີ ກະຊວງໄປສະນີ ໂທລະຄົມມະນາຄົມ ແລະ ການສື່ ສານ (ປທສ) ໄດ້ຕ້ອນຮັບ ທ່ານ ອາເລັກຊັນເດີ ຊີ. ເຟວແມນ (Alexander C.Fieldman) ປະທານ ແລະ ຜູ້ບໍລິ ຫານສະພາທຸລະກິດ ອາຊຽນ-ອາເລິກາ, ທ່ານ ນາງ ຣີນາ ບິດເຕີ (Rena Bitter), ເອກອັກຄະລັດຖະທູດ ສະຫະລັດ ອາເມລິກາ ຜູ້ມີອໍານາດເຕັມ ປະຈໍາ ສປປ ລາວ ແລະ ທ່ານ ໄມໂຄ ມິດຊາລັກ (Micheal Michalak) ຮອງປະທານ ສະພາອາວຸໂສ, ຜູ້ຈັດການສະພາທຸລະກິດລະດັບພາກພື້ນ ອາຊຽນ-ອາເມລິກາພ້ອມດ້ວຍຄະນະເຂົ້າຢ້ຽມຂໍ່ານັບ ເນື່ອງໃນໂອກາດທີ່ໄດ້ມາຢ້ຽມຢາມ ສປປ ລາວ ໃນການປຶກສາຫາລື ກາລະໂອກາດ ໃນການລົງທຶນຂອງບັນດາ ຜູ້ປະ ກອບການ ທີ່ມີຄວາມສົນໃຈ ໃນການຂະຫຍາຍທຸລະກິດສູ່ ສປປ ລາວ.

ທ່ານ ບຸນສະເຫຼີມໄຊ ເຄນນາວົງ ໄດ້ສະແດງຄວາມຍິນດີຕ້ອນຮັບ ຊົມເຊີຍ ແລະ ຕີລາຄາສູງ ຕໍ່ການຢ້ຽມຢາມ ຂອງ ຄະນະດັ່ງກ່າວ ພ້ອມນັ້ນ ກໍ່ໄດ້ລາຍງານສະພາບການພັດທະນາຂະແໜງການໄອຊີທີ ໂດຍສັງເຂບ ແລະ ແຜນຍຸດທະ ສາດພັດທະນາຂະແໜງການ ປທສ ໄລຍະ 10 ປີ ໃນການຄຸ້ມຄອງ, ພັດທະນາ, ສົ່ງເສີີມ ການດຳເນີນທຸລະກິດ ແລະ ກະກຽມການຫັນເປັນດິຈິຕອນ.

ໃນໂອກາດດຽວກັນນີ້ ຜູ້ຕາງໜ້າຈາກບັນດາບໍລິສັດ ສະຫະລັດອາເມລິກາ ເຊັ່ນ: ບໍລິສັດ ໄມໂຄຣຊອບ (Microsoft ), ບໍລິສັດ ມາສເຕີຄາດ (Master card) ແລະ ບໍລິສັດ ເອັກພີເດຍ (Expedia) ກໍ່ໄດ້ລາຍງານສະພາບພັດທະນາ ແລະ ການດໍາເນີນທຸລະກິດໃນຂົງເຂດອາຊີປາຊີຟິກໃນໄລຍະຜ່ານມາ ໂດຍສະເພາະບັນດາການຮ່ວມມືກັບກະຊວງ ປທສ ເປັນຕົ້ນການຮັບຮອງເອົາຕົວອັກສອນເພັດສະລາດໂອທີ (Phetsarath OT) ເຂົ້າໃນລະບົບປະຕິບັດການ ຊອບແວ ແລະ ການຈັດຕັ້ງປະຕິບັດບົດບັນທຶກຄວາມເຂົ້າໃຈໃນການສ້າງຖານອອນລາຍ (Platform) ສໍາລັບການ ສືກສາຊັ້ນສູງ ທີ່ໄດ້ລົງນາມລະຫວ່າງສາມພາກສ່ວນ (ກະຊວງ ປທສ, ກະຊວງ ສືກສາທິການ ແລະກິລາ ແລະ ບໍລິສັດ ໄມໂຄຣຊອບ ໃນ ທ້າຍປີ 2016).

ໃນຕອນທ້າຍ ທ່ານ ອາເລັກຊັນເດີ ຊີ. ເຟວແມນ ໄດ້ສະແດງຄວາມຂອບໃຈຕໍ່ການຕ້ອນຮັບອັນອົບອຸ່ນ ແລະ ການ ຮ່ວມມືໃນໄລຍະຜ່ານມາ. ທ່ານກ່າວຕຶ່ມວ່າ: “ບັນດາບໍລິສັດໃນສະພາທຸລະກິດລະດັບພາກພື້ນອາຊຽນ-ອາເມລິກາ ມີຄວາມສົນໃຈຕໍ່ການພັດທະນາວຽກງານ ໄອຊີທີ ແລະ ການລົງທຶນໃນ ສປປ ລາວ ແລະ ເຫັນວ່າການພົບປະຄັ້ງນີ້ ຈະເປັນເວທີໃນການປຶກສາຫາລືໃນການສ້າງກາລະໂອກາດ ໃນການຮ່ວມມື ເພື່ອສົ່ງເສີມນະໂຍບາຍ ແລະ ສ້າງຂີດ ຄວາມສາມາດໃນການພັດທະນາເສດຖະກິດດີຈິຕອນ, ນະໂຍບາຍການບໍລິການດ້ານການເງິນ, ທຸລະກິດຂະໜາດ ນ້ອຍ-ກາງ, ການພັດທະນາຊັບພະຍາກອນມະນຸດ ແລະ ຄວາມເປັນໄປໄດ້ໃນການສ້າງກົນໄກຄູ່ຮ່ວມພັດທະນາ ພາກ ລັດ-ເອກະຊົນ (PPP) ຢູ່ ສປປ ລາວ”. ພ້ອມນີ້, ທ່ານ ທ່ານ ອາເລັກຊັນເດີ ຊີ. ເຟວແມນ ໄດ້ສະແດງຄວາມເຫັນໃຈ ມາຍັງລັດຖະບານ ສປປ ລາວ ກໍ່ຄືຄອບຄົວ ແລະ ປະຊາຊົນຜູ້ທີ່ໄດ້ຮັບຜົນກະທົບຈາກໄພນໍ້າຖ້ວມຢູ່ ເມືອງສະໜາມ ໄຊ, ແຂວງ ອັດຕະປື.

ຂ່າວໂດຍ: ກົມແຜນການແລະການຮ່ວມມື, ປທສ

ພາບ: ຫ້ອງການກະຊວງ

ທີ່ມາ http://mpt.gov.la/

ຄວາມຄິດເຫັນ

ຄວາມຄິດເຫັນ

LEAVE A REPLY

Please enter your comment!
Please enter your name here