ທ່ານ ບຸນສະເຫຼີມໄຊ ເຄນນາວົງ ເຂົ້າຮ່ວມກອງປະຊຸມ ເສັ້ນທາງສາຍໄໝ ທີ່ ສປ. ຈີນ

0
50

ທ່ານ ບຸນສະເຫຼີມໄຊ ເຄນນາວົງ ຮອງລັດຖະມົນຕີ ກະຊວງ ໄປສະນີ, ໂທລະຄົມມະນາຄົມ ແລະ ການສື່ສານ (ປທສ) ພ້ອມດ້ວຍຄະນະ ໄດ້ເດີນທາງເຂົ້າຮ່ວມ ກອງປະຊຸມ ຂໍ້ມູນຂ່າວສານທ່າເຮືອ ຈີນ-ອາຊຽນ ຄັ້ງທີ 3 ທີ່ເມືອງໜານ ໜິງ, ສປ ຈີນ, ໃນລະຫວ່າງວັນທີ 12-14 ກັນຍາ 2018 ເພື່ອປຶກສາຫາລື ແລກປ່ຽນບົດຮຽນຮ່ວມກັນ ແລະ ຊຸກຍູ້ ການຮ່ວມມືຢ່າງເປັນຮູບປະທຳໃນການເຮັດທຸລະກິດໃນພາກພື້ນ ກ່ຽວກັບວຽກງານດ້ານເສດຖະກິດດິຈິຕອນ, ການ ແລກປ່ຽນວັດທະນະທຳ, ການອຳນວຍຄວາມສະດວກໃນການເຊື່ອມໂຍງສາກົນ ຕໍ່ກັບພື້ນຖານໂຄງລ່າງການສື່ສານ ຂໍ້ມູນຂ່າວສານ, ການຄ້າເອເລັກໂຕຣນິກ, ການນຳທາງດ້ວຍລະບົບດາວທຽມ ແລະ ອື່ນໆ.

ການເຂົ້າຮ່ວມກອງປະຊຸມໃນຄັ້ງນີ້ ທ່ານ ບຸນສະເຫຼີມໄຊ ເຄນນາວົງ ໄດ້ກ່າວຕໍ່ກອງປະຊຸມ ພາຍໃຕ້ຫົວຂໍ້ “ການສ້າງ ເສັ້ນທາງສາຍໄໝ, ການແບ່ງປັນເສດຖະກິດດິຈິຕອນ” (Building the Digital Silk Road, Sharing the Digital Economy), ວ່າ: ການສ້າງເສັ້ນທາງສາຍໄໝດິຈິຕອນ ທີ່ເຫັນວ່າຈະເປັນການສະໜັບສະໜູນ ສປປ ລາວ ໃນການ ເຊື່ອມຕໍ່ເຂົ້າສູ່ລະດັບພາກພື້ນ ແລະ ສາກົນ ພ້ອມທັງຊ່ວຍອຳນວຍຄວາມສະດວກໃນການເຂົ້າເຖິງການຄ້າ, ການລົງ ທຶນ, ການທ່ອງທ່ຽວ ແລະ ການແລກປ່ຽນຂໍ້ມູນຂ່າວສານຂອງປະຊາຊົນ.

ສປປ ລາວ ເປັນປະເທດທີ່ມີຂະຫນາດນ້ອຍ ແລະ ບໍ່ມີຊາຍແດນຕິດກັບທະເລ ຈຶ່ງເປັນສິ່ງທ້າທ້າຍອີກຢ່າງໜຶ່ງ ແຕ່ ພວກເຮົາສາມາດປ່ຽນສິ່ງທ້າທາຍເລົ່ານັ້ນໃຫ້ເປັນໂອກາດໄດ້ ໂດຍສ້າງໃຫ້ ສປປ. ລາວ ເປັນປະເທດທີ່ເປັນຈຸດເຊື່ອມ ໂຍງ ຂອງບັນດາປະເທດຕ່າງໆ ໂດຍສະເພາະແລ້ວ ພວກເຮົາມີຊາຍແດນຕິດກັບ 4 ປະເທດໃນອາຊຽນ ແລະ ພວກ ເຮົາເຊື່ອວ່າຈະສາມາດເປັນສູນກາງການເຊື່ອມຕໍ່ ບັນດາປະເທດເຂົ້າຫາກັນ ກ້າວໄປສູ່ການເຊື່ອມຕໍ່ລະດັບສາກົນ.

ພ້ອມດຽວກັນນີ້ ກໍ່ໄດ້ເຂົ້າຮ່ວມກອງປະຊຸມສາກົນ “ເສັ້ນທາງສາຍໄໝ ແລະ ເສດຖະກິດດິຈິຕອນ” ທີ່ເມືອງຫາງໂຈ, ສປ ຈີນ ໃນລະຫວ່າງວັນທີ 17-19 ກັນຍາ 2018. ເພື່ອປຶກສາຫາລື ແລະ ແລກປ່ຽນທັດສະນະໃນການກະ ກຽມສູ່ ຍຸກດິຈິຕອນ 4.0 ພາຍໃຕ້ຂໍ້ລິເລິ່ມ ເສັ້ນທາງສາຍໄໝ.

ຕໍ່ມິດຕະພາບ ແລະ ການຮ່ວມມື ລະຫວ່າງ ສປປ ລາວ ແລະ ສປ ຈີນ ໜື່ງແລວ ໜຶ່ງເສັ້ນທາງ ໄດ້ສະແດງອອກ ໃນ ການໄປຢ້ຽມຢາມ ສປປ ລາວ ໃນທ້າຍປີ 2017 ຂອງພະນະທ່ານ Xi Jinping ປະທານປະເທດແຫ່ງ ສປ ຈີນ ໂດຍທັງ ສອງປະເທດ ໄດ້ລົງນາມເອກະສານ MoU ແລະ ເອກະສານການຮ່ວມມື ລວມທັງໝົດ 17 ສະບັບ ໃນນັ້ນ ມີເອກ ສານລົງນາມ ລະຫວ່າງ ກະຊວງ ປທສ ແລະ ຄະນະປະຕິຮູບ ແລະ ພັດທະນາແຫ່ງຊາດ ສປ ຈີນ ເພື່ອການພັດທະນາ ເສດຖະກິດດິຈິຕອນ ເຊັ່ນວ່າ: ຂະຫຍາຍການເຂົ້າເຖິງອິນເຕີເນັດຄວາມໄວສູງ, ສົ່ງເສີມການຫັນເປັນດິຈິຕອນ, ການຄ້າເອເລັກໂຕຣນິກ, ການສ້າງຄວາມອາດສາມາດ ແລະ ອື່ນໆ.

ນອກນີ້ ທ່ານ ບຸນສະເຫຼີມໄຊ ເຄນນາວົງ ພ້ອມດ້ວຍຄະນະ ຍັງໄດ້ເຂົ້າຮ່ວມ ແລະ ປະກອບຄຳເຫັນໃນກອງປະຊຸມ ຫົວຂໍ້: ແອບພລິເຄເຊີນ ແລະ ເຕັກໂນໂລຊີ 5G (5G Technology and Application Forum), ຊຶ່ງເປັນເວ ທີສົນທະນາແລກປ່ຽນ ວິໄສທັດເພື່ອການພັດທະນາ ແລະ ຄວາມຄາດຫວັງໃນການນຳໃຊ້ເຕັກໂນໂລຊີ 5G, ພ້ອມ ກັບສຳຫຼວດການເຊື່ອມຕໍ່ເຄືອຂ່າຍ 5G, IoT, ການເຊື່ອມຕໍ່ທີ່ສະຫຼາດສຳລັບ ນະວັດຕະກຳທາງເຕັກໂນໂລຊີ ແລະ ການພັດທະນາເສດຖະກິດ.

ໃນໂອກາດດຽວກັນ ກໍ່ໄດ້ພົບປະສອງຝ່າຍ ກັບຄະນະຜູ້ແທນຈາກອົງການຄຸ້ມຄອງອິນເຕີເນັດ ສປ ຈີນ ນໍຳໂດຍທ່ານ Yang Xiao Wei ຮອງລັດຖະມົນຕີ ອົງການຄຸ້ມຄອງອິນເຕີເນັດ ສປ.ຈີນ ແລະ ຄະນະປະຕິຮູບ ແລະ ພັດທະນາ ແຫ່ງຊາດ ສປ.ຈີນ (NDRC) ນຳໂດຍທ່ານ Ren Zhiwu ຮອງປະທານ ຄະນະປະຕິຮູບ ແລະ ພັດທະນາແຫ່ງຊາດ ສປ ຈີນ. ຊຶ່ງທັງສອງຝ່າຍໄດ້ລາຍງານສະພາບພັດທະນາໄອຊີທີຂອງທັງສອງປະເທດ ເຫັນດີຮັດແໜ້ນການຮ່ວມມື ສຸມໃສ່ການຈັດຕັ້ງປະຕິບັດ MoU ທີ່ໄດ້ເຊັນໃນປີ 2015 ໃຫ້ມີປະສິດທິພາບ, ປະສິດທິຜົນ ແລະ ສືບຕໍ່ການຮ່ວມມື ຜັນຂະຫຍາຍບົດບັນທຶກຄວາມເຂົ້າໃຈທີ່ໄດ້ລົງນາມ ໃນປີ 2017 ພ້ອມທັງຊຸກຍູ້ໃຫ້ມີໂຄງການທີ່ເປັນຮູບປະທຳ ເພື່ອ ພັດທະນາຂະແໜງການໄອຊີທີ ຢ່າງມີປະສິດທິຜົນ.

ຂ່າວໂດຍ ກົມແຜນການ ແລະການຮ່ວມມື.

ທີ່ມາ http://mpt.gov.la/

ຄວາມຄິດເຫັນ

ຄວາມຄິດເຫັນ

LEAVE A REPLY

Please enter your comment!
Please enter your name here